तलवारीचा नंगा नाच करत तडीपार गुंडाची दहशत;आरोपीला चिंचवड पोलिसांनी केली अटक
चिंचवड (वास्तव संघर्ष) : चिंचवड गावात हातात नंगी तलवार नाचवत तसेच रस्त्यावर उतरून शिवीगाळ करत दहशत निर्माण करणा-या एका तडीपार आरोपीला चिंचवड पोलिसांनी अटक केली आहे . ही घटना शुक्रवारी ( दि .10 ) साडेतीनच्या सुमारास घडली आहे .
गुंडा विरोधी पथकाचे पोलीस रामदास मोहिते यांनी याबाबत चिंचवड पोलीस ठाण्यात फिर्याद दिली आहे.
विकी अनिल घोलप ( वय 24 , रा . पागेची तालिम , चिंचवडगाव ) असे अटक करण्यात आलेल्या आरोपीचे नाव आहे .
पोलिसांनी दिलेल्या माहितीनुसार , आरोपी विकी घोलप याला पिंपरी – चिंचवड पोलीस आयुक्तालय , पुणे शहर आणि पुणे ग्रामीण हद्दीतून तडीपार करण्यात आले आहे . आरोपीने तडीपार आदेशाचा भंग करत हातात नंगी तलवार घेऊन हवेत नाचवत दहशत निर्माण केली . तसेच ‘मी इथला भाई आहे ‘ असे म्हणत शिवीगाळ केली . अधिक तपास सहायक पोलीस निरीक्षक डबल तसेच पोलीस उपनिरीक्षक कुदळे करीत आहेत .
