पिंपरी चिंचवडमध्ये चंदनाची तस्करी करणाऱ्या पाच आरोपींना पोलिसांनी केली अटक
पिंपरी (वास्तव संघर्ष) :पिंपरी चिंचवडमध्ये रक्तचंदन चोरून नेणाऱ्या ट्रकला वाकड पोलिसांनी पकडुन मोठी कारवाई केली आहे .आरोपींकडून पोलिसांनी 6.420 टन रक्तचंदन भरलेला ट्रक , एक कार आणि मोबाईल फोन असा एकूण सहा कोटी 52 लाख 45 हजार रुपयांचा मुद्देमाल जप्त केला आहे .याप्रकरणी पोलिसांनी पाच आरोपींना अटक केली आहे.
निलेश विलास ढेरंगे ( वय 35 , रा . मु . पो . पिपंळगाव देपा , संगमनेर , अहमदनगर ) , एम . ए . सलिम ( वय 43 , रा . नंबर 62 जोग रोड कारगल कॉलनी , ता.सागर , जि . शिमोगा , कर्नाटक ) , विनोद प्रकाश फर्नाडिस ( वय 45 , रा . नाईक चाळ , एमजीम हॉस्पीटल शेजारी कातकरवाडी , नौपाडा , कळंबोली , नवी मुंबई ) , झाकीर हुसेन अब्दुलरेहमान शेख ( वय 50 , रा . एफ / जी / 1 चिता गेट , ट्रॉम्बे , मुंबई ) , मिन्टोभाई उर्फ निर्मलसिंग मंजितसिंग गिल ( वय 36 , रा . मॅकडोनल्डजवळ , कळंबोली , नवी मुंबई ) अशी अटक केलेल्या आरोपींची नावे आहेत .
याबाबत पोलीस आयुक्त कृष्ण प्रकाश यांनी पञकार परिषदेत माहिती दिली ते म्हणाले, वाकड पोलीस स्टेशनच्या हद्दीमध्ये पोलीस नाईक वंदु गिरे आणि पोलीस हवालदार राजेंद्र काळे 12 मे रोजी पेट्रोलिंग करत होते . व्हीजन मॉल ताथवडे येथे त्यांना एक पांढ – या रंगाची मारुती 800 कार दिसली . त्या कारला पुढे नंबर प्लेट नव्हती व मागील नंबर प्लेट ही अर्धवट तुटलेली होती . काहीजण कार जवळ थांबले असल्याने कारचा पोलिसांना संशय आला . पोलिसांनी त्यातील तिघांना पकडले आणि त्यांच्याकडे विचारणा केली . पकडलेल्या तिघांच्या मागे थांबलेले दोघेजण अंधारात पळून गेले . त्यामुळे पोलिसांनी तिघांकडे चौकशी केली . सुरुवातीला त्यांनी उडवाउडवीची उत्तरे दिली . त्यानंतर निलेश ढेरंगे याच्या मोबाईल फोनची पाहणी केली असता त्यात रक्त चंदनाने भरलेल्या ट्रकचे फोटो शेअर केल्याचे दिसले .
आरोपींनी रक्तचंदन चोरुन रक्तचंदनाने भरलेला ट्रक ( एम एच 40 / ए के 1869 ) निलकमल हॉटेल समोरील मोकळ्या जागेत ताथवडे येथे उभा केल्याचे निष्पन्न झाले . पोलिसांनी ट्रक जवळ जाऊन पाहणी केली . ट्रकमध्ये पिवळसर रंगाचे स्पंज ( फोम ) शीट्सच्या पाठीमागे सुमारे पाच ते सहा फुटाचे गोलाकार रक्त चंदनाचे 6.420 टन वजनाचे लाकडी ओंडके आढळले .सुरुवातीला पोलोसांनी निलेश , सलीम , विनोद या तिघांना अटक केली . त्यानंतर अन्य दोघांना नवी मुंबई येथून अटक करण्यात आली आहे . आरोपींकडून 6.420 टन वजनाचे 207 नग रक्तचंदन लाकडाचे ओंडके , एक ट्रक , एक कार , दोन मोबाईल फोन , असा एकूण सहा कोटी , 52 लाख , 45 हजार रुपयांचा मुद्देमाल जप्त करण्यात आला आहे . आरोपींनी बनावट कागदपत्रे व ट्रकच्या बनावट नंबर प्लेटच्या आधारे रक्तचंदन चोरुन आणल्याचे निष्पन्न झाले आहे . हा माल कुठून आणला व कुठे विक्री करणार होते . तसेच रक्तचंदन तस्करीचे काही अंतराष्ट्रीय कनेक्शन आहे का , याबाबत पोलीस तपास करीत आहेत . अटक केलेल्या आरोपींचे आणखी चार साथीदार फरार आहेत . त्यातील दोघेजण दुबईचे आहेत . त्यामुळे या प्रकरणात वाकड पोलिसांनी रक्तचंदन तस्करीचे आंतरराष्ट्रीय कनेक्शन उघडकीस आणले आहे .अधिक तपास पोलिस करीत आहेत.
