देहुगावातील जुगार अड्ड्यावर पोलिसांचा छापा

देहूरोड (वास्तव संघर्ष) : पिंपरी चिंचवड पोलीस आयुक्तालयाच्या हद्दीत अवैध धंदयावर कारवाई करणेबाबत पोलीस आयुक्तांनी आदेश दिले होते. त्याअनुषंगाने दरोडा विरोधी पथकाने येलवडी रोड , देहुगाव येथील एस एच ई पी एल हेव्ही इंडस्ट्रीयल फॅब्रिकेशन लिमिटेड कंपनीचे गेटच्या आतील बिल्डींग मध्ये ही कारवाई केली आहे.

शेखर गुलाब परंदवाड (वय-50 रा.माळवाडी देहुगाव. जि. पुणे) व इतर 25 आरोपी यांना पोलिसांनी ताब्यात घेतले आहे.

पोलिसांनी दिलेल्या माहितीनुसार, देहुगाव येथील एस एच ई पी एल हेव्ही इंडस्ट्रीयल फॅब्रिकेशन लिमिटेड कंपनीच्या गेटच आत बिल्डींगमध्ये जुगार खेळत आहेत अशी खात्रीशीर बातमी मिळाली. त्याबाबत वरिष्ठ अधिकारी यांना माहिती देवुन दरोडा विरोधी पथकाकडील पोलीस स्टाफ व गुन्हे शाखा युनिट 5 कडील स्टाफ असे मिळालेल्या बातमीच्या ठिकाणी जावुन , सापळा रचुन रात्री दोन वाजता छापा टाकला. त्यानंतर आरोपी शेखर व इतर 25 आरोपींना पोलिसांनी अटक केली आहे. त्याच्यांकडून एकुण 5,33,610 रूपये रोख रक्कम एक हुंडाई कंपनीची क्रेटा कार एक मारुती स्विफ्ट कार अशी 2 चारचाकी वाहने , 18 दुचाकी वाहने , 27 मोबाईल फोन व इतर जुगाराचे साहित्य असा एकुण 35,10, 270रूपये किंमतीचा मुद्देमाल मिळुन आल्याने त्यांचे विरूध्द महाळुंगे पोलीस ठाण्यात गुन्हा दाखल करण्यात आला.