आकुर्डी रेल्वे स्थानकाजवळ मालगाडीच्या धावत्या रेल्वेखाली सापडून दोघांचा मृत्यू

पिंपरी (वास्तव संघर्ष) – पिंपरी चिंचवडमधील आकुर्डी रेल्वे स्थानकाजवळ मालगाडीच्या धावत्या रेल्वेखाली सापडून दोघांचा मृत्यू झाला आहे. ही घटना आज (शुक्रवार) पहाटेच्या सुमारास घडली आहे. गौतमी महेंद्र जाधव (वय-२९, राहणार, चिखलीगाव ), रवी चंदर पिलाव (वय-३५, राहणार – विकासनगर देहूरोड ) अशी अपघातात मृत्यू झालेल्यांची नावं आहेत.

रेल्वे पोलिसांनी दिलेल्या माहितीनुसार, पिंपरी-चिंचवड येथील आकुर्डी रेल्वेस्थानकासमोरील रेल्वे रूळ ओलांडताना रेल्वेच्या धडकेत दोघांचा मृत्यू झाला आहे. मृत गौतमी जाधव आणि रवी पिलाव हे दोघेजण मालगाडी समोरून येत असतानाही रेल्वे रूळ ओलांडत होते.

अखेर वेगाचा अंदाज न आल्याने व त्याना वेळेत रुळ ओलांडता न आल्याने भरधाव वेगातील मालगाडीची दोघांना धडक बसली. ज्यामध्ये दोघांचा घटनास्थळीच मृत्यू झाला. दरम्यान, रेल्वे रूळ ओलांडून मृत्यूला आमंत्रण देऊ नका, असे आवाहन रेल्वे पोलीस कर्मचारी सुनील लोंढे यांनी केले आहे.