धक्कादायक :पिंपरी चिंचवड येथे महिलेवर टेम्पोमध्येच बलात्कार ;चालक आणि त्याचा साथीदार फरार

पिंपरी(वास्तव संघर्ष) : पिंपरी चिंचवडमध्ये धक्कादायक घटना समोर आली आहे एका महिलेला पेरणे फाटा येथे सोडतो असे सांगून टेम्पो चालकाने त्या महिलेला पिंपरी चिंचवडला आणून त्याने आणि त्याच्या सोबत असलेल्या क्लिनरने तिच्यावर टेम्पोमध्येच बलात्कार केला . आळंदी ते पिंपरी चिंचवड परिसरात १० मार्चला रात्री अकरा ते ११ मार्च रोजी पहाटे ४ वाजण्याच्या दरम्यान हा सर्व प्रकार घडला आहे .

याप्रकरणी एका २९वर्षाच्या महिलेने आळंदी पोलिसांकडे फिर्याद दिली आहे . या फिर्यादीवरुन पोलिसांनी आयशर टेम्पो चालक व क्लिनर यांच्याविरुद्ध गुन्हा दाखल केला आहे . याबाबत पोलिसांनी सांगितले की , आळंदी येथील या महिलेला १० मार्च रोजी रात्री ११ वाजता टेम्पो चालकाने पेरणे फाटा येथे घेऊन जातो , असे सांगून गाडीत बसवून घेतले .

त्यानंतर त्याने टेम्पो पेरणेफाटा येथे घेऊन न जाता पिंपरी चिंचवडच्या दिशेने नेला . त्यानंतर टेम्पोमध्येच तिच्यावर चालक व क्लिनर यांनी बलात्कार केला . त्यानंतर त्यांनी या महिलेला शिवीगाळ करुन मारहाण केली व कोणाला काही सांगितल्यास जीवे मारण्याची धमकी देऊन पहाटे ४ वाजण्याच्या सुमारास पिंपरी चिंचवडला सोडून ते पसार झाले . या घटनेनंतर ही महिला परत आळंदी येथे आली . तिने पोलिसांकडे धाव घेतली . बुधवारी रात्री उशिरा याप्रकरणी गुन्हा दाखल करण्यात आला आहे . पोलीस उपनिरीक्षक लोहेकर अधिक तपास करत आहेत .