चिखलीमध्ये भरदिवसा खुन करणाऱ्या आरोपीला पोलिसांनी बारा तासाच्या आत केली अटक
पिंपरी (वास्तव संघर्ष) : पिंपरी चिंचवडमधील चिखलीमध्ये भरदिवसा तरुणाचा कोयत्याने वार करून डोक्यात दगड घालून निघृणपणे खून करण्यात आला . ही घटना आज रविवारी ( दि . 11 ) दुपारी साने कॉलनी रोडवर , मोरेवस्ती येथे घडली .खून करणाऱ्या आरोपीला पोलिसांनी बारा तासाच्या आत अटक केली आहे.
कानिफनाथ क्षीरसागर (वय-38 रा . परशुराम चौक चिंचवड ) असे खून झालेल्या तरुणाचे नाव आहे .
याबाबत सोनल कानिफनाथ क्षीरसागर यांनी चिखली पोलीस ठाण्यात फिर्याद दिली आहे.
त्यानुसार आकाश उर्फ मकसुद विजय जाधव (वय-19,रा. कुदळवाडी चिखली) याला पोलिसांनी अटक केली असून एका अल्पवयीन मुलावर गुन्हा दाखल करण्यात आला आहे.
पोलिसांनी दिलेल्या माहितीनुसार , मृत कानिफनाथ त्यांच्या अडीच वर्षांच्या मुलासोबत रविवारी सकाळी चिखली परिसरात आले होते . त्यावेळी आरोपी आकाश उर्फ मकसुद आणि त्याचा साथीदार मारेकरी त्यांचा पाठलाग करत होता . साने चौकाजवळ आल्यानंतर आरोपींनी कानिफनाथ यांच्या डोक्यात धारदार हत्याराने वार केले . त्यानंतर डोक्यात दगड मारून निघृणपणे खून केला . हा प्रकार साने चौकापासून सुमारे दोनशे मीटरच्या अंतरावर दाट लोकवस्तीच्या ठिकाणी घडला . भरदिवसा हा प्रकार घडल्याने परिसरात भीतीचे वातावरण निर्माण झाल्याने आरोपींना पोलिसांना बारा तासाच्या आत अटक केली आहे. फिर्यादी सोनल यांच्या पतीने आरोपी आकाश यांना घरातून बाहेर काढल्याच्या गैरसमजातून हा खून केला असल्याचे आरोपींने कबूल केले आहे.अधिक तपास चिखली पोलीस करीत आहेत.
