भोसरीत सराईत गुन्हेगाराचा हवेत गोळीबार
पिंपरी (वास्तव संघर्ष) :पिंपरी चिंचवडच्या भोसरी परिसरात सराईत गुन्हेगाराने पूर्ववैमनस्यातून हवेत गोळीबार केला आहे . ही घटना मंगळवारी ( दि. ४)सकाळी अकराच्या सुमारास गणेशनगर , भोसरी येथे घडली . याप्रकरणी तीन जणांविरोधात एमआयडीसी भोसरी पोलीस ठाण्यात गुन्हा दाखल केला आहे .
पोलिसांनी दिलेल्या माहितीनुसार , फिर्यादी प्रशांत आणि आरोपी ज्ञानेश्वर हे एकमेकांचे नातेवाईक असून त्यांच्यात जुनी भांडणे आहेत . सकाळी अकराच्या सुमारास ज्ञानेश्वर हा साथीदारांना घेऊन प्रशांत यांच्या घरी आला . त्यावेळी आरोपींनी आपसात संगनमत करून प्रशांत यांना अर्वाच्च भाषेत शिवीगाळ करीत जीवे मारण्याची धमकी दिली . .
ज्ञानेश्वर याने हवेत गोळीबार करीत प्रशांत यांच्या गळ्यातील पाच तोळ्याची सोन्याची चेन हिसकावली असल्याचे फिर्यादीत म्हटले आहे . सुदैवाने या घटनेत कोणीही जखमी झाले नाही . घटनेची माहिती मिळताच पोलिसांचा मोठा फौजफाटा घटनास्थळी दाखल झाला . ज्ञानेश्वर लांडगे याच्यावर यापूर्वी काही गंभीर गुन्ह्यांची नोंद आहे . तो पाच वर्ष तो तुरुंगात देखील होता . मात्र , सर्व गुन्ह्यातून सुटल्यामुळे तो सध्या बाहेर असून यापूर्वी त्याच्यावर प्रतिबंधात्मक कारवाई करण्यात आली आहे . एमआयडीसी भोसरी पोलीस तपास करीत आहेत .
