एका तरूणाला बेदम मारहाण करत त्याच्यावर कोयत्याने केले वार;चिखली पोलीस ठाण्यात गुन्हा दाखल

पिंपरी (वास्तव संघर्ष) :पिंपरी चिंचवडमध्ये एका तरूणाला शुल्लक कारणावरून तिघांनी मिळून बेदम मारहाण करत त्याच्यावर कोयत्याने वार केले. ही घटना शुक्रवारी (दि. 14) रात्री नऊ वाजता ताराबाई चौक, मोरेवस्ती, चिखली येथे घडली.

सचिन हनुमंत वाघमारे (वय 22, रा. मोरेवस्ती, चिखली) असे जखमी तरुणाचे नाव आहे. त्यांनी याप्रकरणी चिखली पोलीस ठाण्यात फिर्याद दिली आहे. पोलिसांनी तुषार सुरश भंडारी (रा. मोरेवस्ती, चिखली) आणि त्याचे दोन अनोळखी साथीदार यांच्या विरोधात गुन्हा दाखल केला आहे.

पोलिसांनी दिलेल्या माहितीनुसार, फिर्यादी सचिन आणि आरोपी तुषार हे दोघे मोरेवस्ती येथे एकाच सोसायटीमध्ये राहतात. शुक्रवारी रात्री नऊ वाजता आरोपी तुषार सचिन यांना पाहून थांबला. त्यामुळे सचिन यांनी त्याला ‘काय रे तुष-या’ अशी एकेरी हाक मारली.या कारणावरून तुषारने सचिन यांची कॉलर पकडून ‘मला तुष-या का म्हणाला’ असे म्हणून सचिन यांना मारहाण केली. त्यानंतर तुषारचे अन्य दोन साथीदार आले. त्यांनी सचिन यांच्या डोक्यावर, हातावर कोयत्याने वार करून गंभीर जखमी केले. सचिन गंभीर जखमी अवस्थेत खाली बसले.त्यावेळी आरोपींनी कोयता फिरवून लोकांमध्ये दहशत निर्माण केली. चिखली पोलीस तपास करीत आहेत