पुरावा नष्ट करण्यासाठी त्यांनी जाळला चेहरा ;भोसरीत सापडला अर्धवट जळालेला मृतदेह
भोसरी (वास्तव संघर्ष) :- एमआयडीसी भोसरी पोलीस ठाण्याच्या हद्दीत एका तरुणाचा अर्धवट जळालेल्या अवस्थेतील मृतदेह आढळला . यामुळे परिसरात एकच खळबळ उडाली आहे . हा प्रकार गुरुवारी ( दि . 18 ) सायंकाळी उघडकीस आला आहे . पुरावा नष्ट करण्याच्या उद्देशाने हा प्रकार करण्यात आल्याची प्राथमिक माहिती पोलिसांनी दिली.
पोलिस उपनिरीक्षक अमरदीप कृष्ण पुजारी यांनी याबाबत भोसरी एमआयडीसी पोलीस ठाण्यात फिर्याद दिली आहे.
पोलिसांनी दिलेल्या माहितीनुसार ,सेक्टर नंबर 11 पार्क 10 एचए पंडित दिनदयाळ उपाध्यक्ष रोडच्या डाव्या बाजूला मोकळ्या मैदानात मोशी येथे निर्जन ठिकाणी वय अंदाजे 30 ते 40 वर्षाच्या तरुणाचा अर्धवट जळालेल्या अवस्थेतील मृतदेह पडल्याची माहिती पोलिसांना मिळाली . त्यानुसार , स्थानिक पोलिसांसह गुन्हे शाखेच्या पथकाने घटनास्थळी धाव घेत पाहणी केली . तरुणाचा चेहरा पूर्णपणे जळाला आहे . त्यामुळे त्याची ओळख पटवण्यात अडचणी येत आहेत .कोणीतरी अज्ञात आरोपींने या व्यक्तिचा खून केला असल्याचे प्राथमिक माहितीनुसार समोर आले आहे. त्यानुसार पोलिसांनी अज्ञात आरोपींविरुद्ध खुनाचा गुन्हा दाखल केला आहे. अधिक तपास भोसरी एमआयडीसी पोलीस करीत आहेत.
