महिलेवर विनयभंगाचा प्रयत्न करून तीचे डोळे निकामी करणा-या नराधमाला पोलिसांनी केली अटक

शिरूर (वास्तव संघर्ष) :शिरूर तालुक्यातील न्हावरे इथे एका महिलेवर विनयभंगाचा प्रयत्न करून त्या महिलेचे डोळे निकामी करणाऱ्या त्या नराधमाला पुणे ग्रामीण पोलिसांनी चाकण येथील मुख्य चौकामध्ये सापळा रचून अटक केली आहे .

कुंडलिक साहेबराव बगाडे ( रा . उंडवडे सुपे , ता . बारामती , जि . पुणे ) असे आरोपीचे नाव आहे .

3 नोव्हेंबर रोजी हा प्रकार घडला होता . पीडित महिला जेवण झाल्यानंतर नैसर्गिक विधींसाठी बाहेर गेली होती . यावेळी आरोपीने तिची छेड काढण्याचा प्रयत्न केला होता परंतु तिने विरोध केल्यानंतर त्यांच्यावर प्राणघातक हल्ला केला होता . यामध्ये तिच्या दोन्ही डोळ्यांना गंभीर जखमा झाल्या असून या दोन डोळ्यांची दृष्टी गेली आहे . या महिलेवर सध्या ससून रुग्णालयात उपचार सुरू आहेत . या गुन्ह्याचा तपास सुरू असताना पोलिसांनी न्हावरे परिसरातील सीसीटीव्ही फुटेज तपासले असता एक व्यक्ती संशयास्पदरित्या फिरताना आढळली .

त्यानंतर पोलिसांनी या व्यक्तीचा फोटो व्हाट्सअपवर व्हायरल करून ही व्यक्ती दिसल्यास पोलिसांना कळविण्याचे आवाहन केले होते . दरम्यान न्हावरे येथील एका चायनीज सेंटरमध्ये काम करणाऱ्या एक व्यक्तीचे वर्णन पोलिसांनी वायरल केलेल्या फोटोशी मिळते – जुळते असून तो गुन्हा घडल्याच्या दिवसापासून कुठेतरी निघून गेल्याची माहिती गुन्हे शाखेच्या पोलिसांना मिळाली होती . त्यानंतर पोलिसांनी या व्यक्तीशी अधिक माहिती घेतली असता तो स्वभावाने रागीट असून नेहमी दारूच्या नशेत धुंद असतो , त्याच्या गळ्यात नेहमी भगवा मफलर असतो . नेहमी तो कोणाशी तरी वाद घालत असतो , भीक मागतो , मुका असल्याची खूण करतो , अशी माहिती पोलिसांना मिळाली होती . त्यानंतर गुन्हे शाखेच्या पोलिसांनी तपास त्याच्याभोवती केंद्रित केला .

तो जाण्याची संभाव्य ठिकाणी शोधली आणि शिक्रापूर पोलिसांनी सोमवारी संध्याकाळच्या सुमारास चाकण येथून त्याला ताब्यात घेतले . त्याच्याकडे केलेल्या अधिक चौकशीत त्याने हा गुन्हा केल्याची कबुली दिली . हा गुन्हा त्याने का केला ? तो त्या ठिकाणी कसा पोहोचला याची माहिती अद्याप पोलिसांना मिळाली नाही . अधिक तपास पोलीस निरीक्षक प्रविण खानापुरे करीत आहेत .